ಸುಖೀ ದಾಂಪತ್ಯ ೧೬೫

ಕಾಮಕ್ರಿಯೆಯ ಮೂಲಕ ಅರ್ಥ ಕಂಡುಕೊಳ್ಳುವುದನ್ನು ಬಿಟ್ಟು, ಪ್ರಬುದ್ಧ ಸಂಬಂಧದಲ್ಲಿ ಅರ್ಥ ಕಂಡುಕೊಳ್ಳಲು ಕಾಮಕ್ರಿಯೆಯನ್ನು ಬಳಸಿಕೊಳ್ಳಬೇಕು.

165: ವೈವಾಹಿಕ ಲೈಂಗಿಕತೆ-4

ಮಕ್ಕಳಿದ್ದರೆ ಅವರಿಂದ ಲೈಂಗಿಕ ಜೀವನಕ್ಕೆ ಅಡ್ಡಿಯಾಗದಂತೆ ಹೇಗೆ ವ್ಯವಸ್ಥೆ ಮಾಡಿಕೊಳ್ಳಬಹುದೆಂದು ಹೋದಸಲ ತಿಳಿದುಕೊಂಡೆವು. ಈಗ ವಿವಾಹದ ಕೆಲವು ವರ್ಷಗಳ ನಂತರ ಬರುವ ಲೈಂಗಿಕ ಸಮಸ್ಯೆಗಳ ಕುರಿತು ಯೋಚಿಸೋಣ. ಅದಕ್ಕಾಗಿ ನನ್ನಲ್ಲಿ ಬಂದ ಕೆಲವರ ದೃಷ್ಟಾಂತಗಳನ್ನು ನಿಮ್ಮ ಮುಂದಿಡುತ್ತಿದ್ದೇನೆ.  

ದೃಷ್ಟಾಂತ 1: ಮೂವತ್ತೈದರ ಇವನು ನನ್ನ ಹತ್ತಿರ ಶೀಘ್ರಸ್ಖಲನದ ಸಮಸ್ಯೆಯನ್ನು ಇಟ್ಟುಕೊಂಡು ಬಂದಿದ್ದಾನೆ. ಇವನ ಹೆಂಡತಿಯು ಮುಂಚೆ ಕಾಮಕೂಟಕ್ಕೆ ಥಟ್ಟನೇ ತಯಾರಾಗುತ್ತಿದ್ದವಳು ಎರಡು ಮಕ್ಕಳಾದ ನಂತರ ಸಮಯ ತೆಗೆದುಕೊಳ್ಳುತ್ತಾಳೆ. ಇವನಿಗೋ ಅಲ್ಲಿಯ ತನಕ ಉದ್ರೇಕವನ್ನು ತಡೆದುಕೊಳ್ಳಲು ಆಗದೆ ಸಂಭೋಗಕ್ಕೆ ಹೊರಟು ಶೀಘ್ರಸ್ಖಲನದಲ್ಲಿ ಮುಗಿಸಿಬಿಡುತ್ತಾನೆ.  ಆಕೆಗೆ ತೃಪ್ತಿ ಆಗದೆ ಮುಂದಿನ ಸಲ ಸಿದ್ಧಳಾಗಲು ಹಿಂದೆಮುಂದೆ ನೋಡುತ್ತಾಳಂತೆ. ಹಾಗಾಗಿ ತನ್ನ ಸಂಭೋಗದ ಅವಧಿಯನ್ನು ಹೆಚ್ಚಿಸಿಕೊಳ್ಳಲು ಉಪಾಯ ತಿಳಿದುಕೊಳ್ಳಲು ಬಯಸಿದ್ದಾನೆ. ಹೆಂಡತಿಯನ್ನು ಕರೆದುಕೊಂಡು ಬರಲು ಹೇಳಿದರೆ, ಸಮಸ್ಯೆ ತನ್ನಲ್ಲಿದೆ, ಹಾಗಾಗಿ ಆಕೆ ಯಾಕೆ ಬೇಕು ಎನ್ನುತ್ತಾನೆ.

ದೃ. 2: ಮದುವೆಯಾದ ಹೊಸದರಲ್ಲಿ ಲೈಂಗಿಕ ಕ್ರಿಯೆ ಚೆನ್ನಾಗಿತ್ತು. ವರ್ಷದೊಳಗೇ ಮಗುವಾಯಿತು. ಆಗ ಮಾಯವಾದ ಗಂಡನ ಕಾಮಾಪೇಕ್ಷೆಯು ಆರು ವರ್ಷವಾದರೂ ಮರಳಿ ಬಂದಿಲ್ಲ. ಕೇಳಿದರೆ ವಯಸ್ಸಾಯಿತು, ಮನಸ್ಸು ಬರುತ್ತಿಲ್ಲ ಎಂದು ಹೇಳುತ್ತಾನೆ. ವ್ಯಾಯಾಮದಿಂದ ಶರೀರವನ್ನು ಸದೃಢವಾಗಿಟ್ಟುಕೊಂಡಿದ್ದಾನೆ. ತಲೆಗೂದಲೂ ಕರ್ರಗೆ ಮಿಂಚುತ್ತಿದೆ. ಹಾಗಿದ್ದರೂ ಕಾಮಾಸಕ್ತಿಯಲ್ಲಿ ಮಾತ್ರ ವಯಸ್ಸಾಗುವುದು ಉಂಟೆ ಎಂದು  ಈ ಮಹಿಳೆ ಗೊಂದಲಕ್ಕೆ ಒಳಗಾಗಿದ್ದಾಳೆ.

ದೃ. 3: ಐವತ್ತು ವಯಸ್ಸಿನ ಇವನು ಹೆಂಡತಿಯನ್ನು ಕೆರಳಿಸಲು ಪ್ರಯತ್ನಪಡುತ್ತಾನೆ. ಆಕೆ, “ರೀ, ನನ್ನನ್ನೇನೋ ಕೆರಳಿಸುತ್ತೀರಿ. ಆದರೆ ಪೂರ್ತಿ ಮಾಡಲು ನಿಮ್ಮ ಕೈಲಾಗುವುದಿಲ್ಲ. ಸುಮ್ಮನೇ  ನನ್ನ ಸ್ತಿಮಿತ ಯಾಕೆ ಹಾಳುಮಾಡುತ್ತೀರಿ? ತೆಪ್ಪಗೆ ಮಲಗಿಕೊಳ್ಳಿ!” ಎಂದಂದು ಇನ್ನೊಂದು ಕಡೆ ತಿರುಗಿ ಮಲಗುತ್ತಾಳೆ. ಗಂಡ ಏನೂ ತೋಚದೆ ತಲೆಯ ಫ್ಯಾನ್ ದಿಟ್ಟಿಸುತ್ತಾನೆ.  ಅವನಿಗೆ ತಾನೊಬ್ಬನೇ ಇರುವಾಗ ಶಿಶ್ನೋದ್ರೇಕವು ಸರಿಯಾಗಿ ಆಗುತ್ತಿದ್ದರೂ ಹೆಂಡತಿಯ ಜೊತೆ ಇರುವಾಗ ಮಾತ್ರ – ಅದೂ ಕೆಲವು ವರ್ಷಗಳಿಂದ – ವಿಫಲವಾಗುತ್ತಿರುವುದು ಅವನ ದೃಢತೆಯನ್ನು ಕಲಕುತ್ತಿದೆ. ವಯಾಗ್ರಾ ನುಂಗಿದರೂ ಉಪಯೋಗವಾಗಿಲ್ಲ.

ದೃ. 4: ಇಲ್ಲಿ ಗಂಡ ಹೆಂಡತಿಯನ್ನು ನೇರವಾಗಿ ಉದ್ರೇಕಗೊಳಿಸುತ್ತಾನೆ. ನಂತರ ಆಕೆಯ ಮೇಲೇರಿ ರಭಸದಿಂದ ಶುರುಮಾಡುತ್ತಾನೆ. ಒಂದೆರಡು ಸಲ ಚಲಿಸುವುದರ ಒಳಗೆ ಶಾರೀರಿಕ ಆಯಾಸದಿಂದ ಸುಸ್ತಾಗಿ ಆಕೆಯ ಮೇಲೆಯೇ ಒರಗುತ್ತಾನೆ. ಅವನ ಹೃದಯ ಸ್ವಲ್ಪ ದುರ್ಬಲವಾಗಿದೆ ಎಂದು ವೈದ್ಯರು ಹೇಳಿದ್ದಾರೆ – ಹಾಗೆಂದು ಲೈಂಗಿಕ ಕ್ರಿಯೆಗೆ ನಿಷೇಧ ಹಾಕಿಲ್ಲ. ಹಾಗೆ ಆಗುವಾಗಲೆಲ್ಲ ಹೆಂಡತಿಯ ಆತಂಕದ ಪ್ರತಿಕ್ರಿಯೆಗೆ ಹೇಗೆ ಸಮಾಧಾನ ಹೇಳಬೇಕು, ಹಾಗೂ ಇಬ್ಬರಿಗೂ ಆಗುತ್ತಿರುವ ನಿರಾಸೆಯ ನಿರ್ವಹಣೆಯನ್ನು ಹೇಗೆ ಮಾಡಬೇಕು ಎಂಬುದು ಅವನಿಗೆ ತಿಳಿಯದಾಗಿದೆ. 

ದೃ. 5: ನಲವತ್ತು ವರ್ಷದ ಈ ಮಹಿಳೆಗೆ ಮುಟ್ಟು ಸರಿಯಾಗಿದ್ದರೂ ಇತ್ತೀಚೆಗೆ ಯೋನಿ ಒದ್ದೆಯಾಗುತ್ತಿಲ್ಲ, ಹಾಗಾಗಿ ಕಾಮಕೂಟವು ಉರಿಕೂಟವಾಗಿದೆ. ಮಹಿಳಾ ವೈದ್ಯರು ಬರೆದುಕೊಟ್ಟ ಲೋಳೆಯಂಥ ಔಷಧಿಯನ್ನು ಹಚ್ಚಿಕೊಳ್ಳಬೇಕೆಂದರೆ ಕೃತಕ ಅನ್ನಿಸುತ್ತಿದೆ. ಗಂಡನ ನಿರಾಸೆಯನ್ನು ನೋಡಲಾಗುತ್ತಿಲ್ಲ.

ಇವೆಲ್ಲ ದೃಷ್ಟಾಂತಗಳಲ್ಲಿ  ಸಾಮಾನ್ಯ ಅಂಶಗಳಿವೆ. ಇವರೆಲ್ಲ ವಿವಾಹಿತರು. ಲೈಂಗಿಕ ಆಸಕ್ತಿ ಹಾಗೂ ಕಾಮಕ್ರಿಯೆಯಲ್ಲಿ ಮುಂಚೆಯೆಲ್ಲ ಸಮರ್ಪಕವಾಗಿ ಇದ್ದವರು, ಸ್ವಲ್ಪ ವರ್ಷಗಳ ನಂತರ ತೊಂದರೆಗೆ ಈಡಾಗಿದ್ದಾರೆ. ಇವರಲ್ಲಿ ಯಾರಿಗೂ ಶಾರೀರಿಕ ತೊಂದರೆಯಾಗಲೀ, ಗಂಭೀರವಾದ ಕಾಯಿಲೆಯಾಗಲೀ  ಇಲ್ಲ. ತಜ್ಞರ ಸಲಹೆಯಂತೆ  ಔಷಧಿ ಉಪಯೋಗಿಸಿದರೂ ಸುಧಾರಣೆ ಕಂಡುಬಂದಿಲ್ಲ. ಇಲ್ಲೇನಾಗುತ್ತಿದೆ?

ನಾವೆಲ್ಲರೂ ಹೆಚ್ಚಿನಂಶ ಲೈಂಗಿಕವಾಗಿ ಸಮರ್ಥ ವ್ಯಕ್ತಿಗಳೇ ಎನ್ನುವುದರಲ್ಲಿ ಸಂದೇಹವಿಲ್ಲ.  ಸಮಸ್ಯೆ ಏನೆಂದರೆ, ಕಾಮಕ್ರಿಯೆಯನ್ನು ನಾವು “ಚೆನ್ನಾಗಿ ಮಾಡಲು” ಹೊರಡುತ್ತೇವೆ. “ಪರಿಪೂರ್ಣ ತೃಪ್ತಿ ಪಡೆಯಲು“ ಯೋಜಿಸುತ್ತೇವೆ. ಹಾಗಾಗಿ  ಕೆಲವನ್ನು ಉದ್ದೇಶಪೂರ್ವಕ ಮಾಡಲು –ಬೇಗ ತಯಾರಾಗಲು, ಪ್ರತಿ ಕೂಟದಲ್ಲೂ ಮೈ ಜುಮ್ಮೆನ್ನಿಸುವ ರೋಚಕತೆ ಅನುಭವಿಸಲು, ತಾರುಣ್ಯ ಕಾಪಾಡಿಕೊಳ್ಳಲು, ನಮ್ಮ ಹೆಣ್ಣು/ಗಂಡುತನವನ್ನು ಪೂರ್ತಿ ಪ್ರಕಟಪಡಿಸಲು – ಹೆಣಗುತ್ತೇವೆ. ಹಾಗೆಯೆ, ಇನ್ನು ಕೆಲವನ್ನು “ಮಾಡದಿರಲು”– ವಿಫಲವಾಗದಿರಲು, ದೌರ್ಬಲ್ಯ ತಲೆಹಾಕದಿರಲು, ಕೀಳರಿಮೆ ಕಾಡದಿರಲು – ಪ್ರಯತ್ನ ಮಾಡುತ್ತೇವೆ. ಅಷ್ಟಕ್ಕೂ ಇದಕ್ಕಾಗಿ ನಾವು ಅನುಸರಿಸುವ ಮಾದರಿ ಯಾವುದು? ನಾವು ನವತಾರುಣ್ಯದಲ್ಲಿ  ವರ್ತಿಸುತ್ತಿದ್ದ ರೀತಿ, ನಮಗೆ ಗೊತ್ತಿರುವವರು ಬಣ್ಣಿಸುವ ಕಾಮಕೂಟ, ಹಾಗೂ ನೀಲಿಚಿತ್ರಗಳು. ಇದರಲ್ಲೆಲ್ಲ ಯೌವನದ ಹುಚ್ಚು ಆವೇಶ ತುಂಬಿ ತುಳುಕುತ್ತದೆ. ಹಾಗಾಗಿ ವಯಸ್ಸಾಗುತ್ತಿದ್ದರೂ ಯೌವನವನ್ನು ಪ್ರದರ್ಶಿಸಲು ಹೋಗುತ್ತೇವೆ. ಕೂದಲಿಗೆ ಬಣ್ಣ, ಬಿಗಿ ಬಟ್ಟೆಯ ನೆರವು ಪಡೆದುಕೊಳ್ಳುತ್ತೇವೆ. ವಯಾಗ್ರಾ ನುಂಗುತ್ತೇವೆ. ನೀಲಿ ಚಿತ್ರ ಹಾಕಿಕೊಳ್ಳುತ್ತೇವೆ. ನಾನಾ ಭಂಗಿಗಳನ್ನು ಉಪಯೋಗಿಸುತ್ತೇವೆ. ಅಷ್ಟೆಲ್ಲ ಆದರೂ ನಮ್ಮ ಶರೀರವು ಮುಂಚಿನಂತೆ ಸ್ಪಂದಿಸಲಾರದು  ಎಂದು ಗೊತ್ತಿದ್ದರೂ ಕೋತಿಯಾಟ ಆಡಲು ಹೋಗಿ ಕೈಕಾಲು ಮುರಿದುಕೊಳ್ಳುವ ಹಾಗೆ  ಪ್ರಯತ್ನಿಸಿ ಮುಖಭಂಗಕ್ಕೆ ಒಳಗಾಗುತ್ತೇವೆ. ಇದಕ್ಕೆಲ್ಲ ಏನು ಕಾರಣ? ಕಾಮಕೂಟದ “ಸಮಗ್ರ ಸಮಕ್ಷಮತೆಯು ನವತಾರುಣ್ಯದಲ್ಲಿಯೇ ಇದೆ, ನವತಾರುಣ್ಯವನ್ನು ಕಳೆದುಹೋದರೆ ನಾನು ಲೈಂಗಿಕ ವ್ಯಕ್ತಿತ್ವ ಕಳೆದುಕೊಂಡಂತೆ!” ಎಂಬ ಹುಚ್ಚು ನಂಬಿಕೆ. ಹಾಗಾಗಿಯೇ ಇಷ್ಟೆಲ್ಲ ವೃಥಾ ಒದ್ದಾಟ, ವಿಫಲ ಪ್ರಯತ್ನ ಮಾಡುತ್ತೇವೆ. 

ಹಾಗಾದರೆ ಉಪಾಯವೇನು? ನಾವು ಹಾರ್ಮೋನುಗಳ ಮೇಲೆ ಅವಲಂಬಿಸಿದ ಕಾಮಕೂಟದ ಮಾದರಿಯು ವಯಸ್ಸಾದಂತೆ ಕೆಲಸ ಮಾಡುವುದಿಲ್ಲ ಎಂಬ ಸತ್ಯವನ್ನು ಅರಿತುಕೊಳ್ಳಬೇಕು. ಅದನ್ನು ಬಿಟ್ಟುಬಿಸಾಕಿ ನಮ್ಮ ಕೈಲಾಗುವ, ನಮಗಿಷ್ಟವಾಗುವ ಪ್ರಬುದ್ಧ ಲೈಂಗಿಕತೆಯ ಇನ್ನೊಂದು ಮಾದರಿಯನ್ನು ರಚಿಸಿಕೊಳ್ಳಬೇಕು. ವಯಸ್ಸಿನ ಹಾಗೂ ಕಾಯಿಲೆಯ ಕಾರಣದಿಂದ ಶರೀರದಲ್ಲಿ ಬದಲಾವಣೆಗಳು ಆಗುವಾಗ, ಸೂಕ್ತ ಮಾರ್ಪಾಟುಗಳನ್ನು ಮಾಡಿಕೊಳ್ಳುತ್ತ ಕಾಮಕ್ರಿಯೆಯಲ್ಲಿ ಜೀವಂತಿಕೆ ಉಳಿಸಿಕೊಳ್ಳಬೇಕು. ಮುಂಚಿನ, “ಕಾಮಕ್ರಿಯೆಯ ಮೂಲಕ ಅರ್ಥ ಕಂಡುಕೊಳ್ಳಬೇಕು” ಎನ್ನುವುದನ್ನು ಬಿಟ್ಟು, “ಪ್ರಬುದ್ಧ ಸಂಬಂಧದಲ್ಲಿ ಅರ್ಥ ಕಂಡುಕೊಳ್ಳಲು ಕಾಮಕ್ರಿಯೆಯನ್ನು ಬಳಸಿಕೊಳ್ಳಬೇಕು” ಎಂಬ ದಿಕ್ಕಿನಲ್ಲಿ ನಮ್ಮ ಮನೋಭಾವ ಬದಲಾಗಬೇಕು!

ಕಾಮಕ್ರಿಯೆಯಲ್ಲಿ ಪ್ರಬುದ್ಧತೆಯನ್ನು ತರುವುದು ಹೇಗೆ? ಅಮೆರಿಕೆಯ ಲೈಂಗಿಕ ತಜ್ಞ ಮಾರ್ಟಿನ್ ಕ್ಲೀನ್ (Martin Klein)  ಲೈಂಗಿಕ ಬುದ್ಧಿಮತ್ತೆ (sexual intelligence) ಎಂಬ ಪದ ಉಪಯೋಗಿಸುತ್ತಾನೆ. ಅವನ ಪ್ರಕಾರ ಭಾವನಾತ್ಮಕ ಬುದ್ದಿಮತ್ತೆ, ಕ್ರೀಡಾತ್ಮಕ ಬುದ್ಧಿಮತ್ತೆ, ಆಧ್ಯಾತಿಕ ಬುದ್ಧಿಮತ್ತೆಗಳ ಹಾಗೆ ಲೈಂಗಿಕ ಕ್ಷಮತೆಯೂ ಬುದ್ಧಿಮತ್ತೆ ಎನ್ನಿಸಿಕೊಳ್ಳುತ್ತದೆ. ಕ್ಲೀನ್ ಪ್ರಕಾರ, ಲೈಂಗಿಕ ಬುದ್ಧಿಮತ್ತೆಯು ಎರಡು ಅಂಶಗಳನ್ನು ಒಳಗೊಂಡಿದೆ: ಕಾಮಕೂಟದಲ್ಲಿ ಏನೇ ನಡೆಯಲಿ (ಅಥವಾ ನಡೆಯದಿರಲಿ), ವೈಯಕ್ತಿಕವಾಗಿ ಹಾಗೂ ಬಾಂಧವ್ಯದಲ್ಲಿ ಲೈಂಗಿಕ ದೃಷ್ಟಿಕೋನವನ್ನು ಸದಾ ಇಟ್ಟುಕೊಂಡಿರುವುದು (ಇದರ ಬಗೆಗೆ ಇನ್ನೊಂದು ಸಲ ವಿವರಿಸುತ್ತೇನೆ.), ಹಾಗೂ, ಕಾಮಕೂಟವನ್ನು ಮನಸಾರೆ ಅನುಭವಿಸಲು ವಯಸ್ಸಿಗೆ ತಕ್ಕಂತೆ ಸದಾ ಬದಲಾವಣೆ ಮಾಡಿಕೊಳ್ಳುತ್ತಿರುವುದು.  ಉದಾಹರಣೆಗೆ, ಇಪ್ಪತ್ತನೇ ವಯಸ್ಸಿನಲ್ಲಿ ಲೈಂಗಿಕ ಜಗತ್ತನ್ನು ಅನ್ವೇಷಿಸಲು,  ಮೂವತ್ತರಲ್ಲಿ ಸಂಗಾತಿಯೊಡನೆ ಭದ್ರವಾದ ಲೈಂಗಿಕ ಬಾಂಧವ್ಯ ಕಟ್ಟಿಕೊಳ್ಳಲು, ನಲವತ್ತರಲ್ಲಿ ಆಗುವ ಶಾರೀರಿಕ ಕುಂದುಕೊರತೆಗಳನ್ನು ತಡೆದುಕೊಳ್ಳುತ್ತ ಸೂಕ್ತ ಮಾರ್ಪಾಟು ಮಾಡಿಕೊಳ್ಳುವುದು, ಐವತ್ತರಲ್ಲಿ ತಾರುಣ್ಯದ ಲೈಂಗಿಕ ಸಾಮರ್ಥ್ಯಕ್ಕೆ ಮಂಗಳ ಹಾಡಿ ಮನೋಭಾವುಕ ಲೈಂಗಿಕತೆಯನ್ನು ಅಪ್ಪಿಕೊಳ್ಳುವುದು, ಅರವತ್ತರಲ್ಲಿ  ಲೈಂಗಿಕತೆಯ ಜೊತೆಗೆ ಆಧ್ಯಾತ್ಮಿಕತೆಯನ್ನು ಬೆರೆಸಲು ಕಲಿತುಕೊಳ್ಳುವುದು… ಹೀಗೆ ಕಾಮಕೂಟವು ವಯಸ್ಸಿಗೆ ತಕ್ಕಂತೆ ವಿವಿಧ ಮಜಲುಗಳನ್ನು ಏರುತ್ತ ವಿವಿಧ ಆಯಾಮಗಳನ್ನು ಕಂಡುಕೊಳ್ಳುತ್ತದೆ.

ಪ್ರಬುದ್ಧ ಲೈಂಗಿಕ ಬುದ್ಧಿಮತ್ತೆಯ ಬಗೆಗೆ ಇನ್ನಷ್ಟನ್ನು ಮುಂದಿನ ಸಲ ತಿಳಿದುಕೊಳ್ಳೋಣ.

ಉಚಿತ ಸಹಾಯವಾಣಿಗೆ ಕರೆಮಾಡಿ: 8494944888.